वन सम्बद्र्धन प्रणाली कार्यान्वयन भएपछि करिब ४ सय घरधुरी लाभान्वित

लर्निस खबर
बर्दिया, २१ पुष

बर्दियाको ठाकुरबाबा नगरपालिका वडा नं. ५ अन्तरगत रहेको खोदाउ सामुदायिक वन उपभोक्ता समितिमा वन सम्बद्र्धन प्रणाली कार्यान्वयन भएपछि करिब ४ सय घरधुरी लाभान्वित हुने भएका छन् । खोदाउ सामुदायिक वनमा दिगो वन व्यवस्थापन तथा सम्बद्र्वन प्रणाली कार्यान्वयन भएको थाहा पाई फिल्डमा पुग्दा उक्त सामुदायिक वन उपभोक्ता समितिको टिमले सो कुरा बताएका हुन् ।

खोदाउ सामुदायिक वन उपभोक्ता समितिको अध्यक्ष विमला देवी कँडेलले डिभिजिन वन कार्यालय बर्दिया गुलरियाको अनुमति लिएर दिगो वन व्यवस्थापन तथा सम्बद्र्धन प्रणाली अनुसार ७९ वटा उमेर पुगेका साल जातको रुख काटिएको बताए ।
यसै गरी उक्त वन उपभोक्ता समितिको उपाध्यक्ष साधना थारुले आर्थिक वर्ष ०८१÷०८२ को वार्षिक प्राप्तिका आधारमा यस वनमा कटान कार्यक्रम गरिरहेको जानकारी गराउँदै वन सम्बर्दन प्रणालीमा आधारित दिगो वन व्यवस्थापन अन्तर्गत डिभिजन वन कार्यालयबाट स्वीकृती लिएर कटान गरिरहेको बताए ।
उनले आफुहरु सो सामुदायिक वनको नजिक भएकाले पनि रुख काटेर आफ्नो समुहको उपभोक्ता सदस्यहरुको माग बमोजिम आवश्यकता पुर्ति गर्न हरेक वर्ष डिभिजन वन कार्यालयको स्वीकृती लिएर उमेर पुगेका रुखहरुलाई माउ रुखको बचाउ गरी कटान कार्य गरिरहेको जानकारी दिए ।

उपाध्यक्ष थारुले भने,–‘दिगो वन व्यवस्थापनको उद्देश्य वनको दीर्घकालीन उत्पादन वृद्धि गर्दै वातावरणीय लाभ हासिल गर्नु हो । उमेर पुगेका रुखहरूको घनत्व बढी हुँदा तल्लो भाग खुकुलो हुने र वनको विकासमा बाधा पुग्ने भएकाले माउ रुख सुरक्षित राख्दै सान्दर्भिक रुखहरूको कटान गर्दैछौं । यसले स साना बिरुवाहरू छिटो हुर्किन सहयोग पु¥याउँछ । यसले रोजगारी समेत सिर्जना गर्छ । हाम्रो विपन्न समुदायका उपभोक्ता सदस्यहरु भएकाले समेत यस वनमा वन सम्बद्र्धन प्रणाली लागु गर्न आवश्यक ठानी कार्य गरिरहेका छौ । यस वर्ष हामिले कटान गरिएको रुख आन्तिरिक खपत र बाह्य वितरण गर्नेछौं । यस बाट भएको आम्दानीले उपभोक्ता समितिका सदस्यहरु लगायतलाई आय–आर्जनका कार्यक्रमहरु दिन्छौ । वन व्यवस्थापनका कार्यहरु गर्छौ । वन्यजन्तुको संरक्षण तथा मानव वन्यजन्तुको सह–अस्तित्व कायम राख्ने गरी कार्यक्रम गरिरहेका हुन्छौ ।’

ठाकुरबाबा नगरपालिका वडा नं. ५ का वडा अध्यक्ष शम्भु प्रसाद थारुले उमेर पुगेका रुखहरु तथा नयाँ रुख उत्पादन गर्न नसक्ने रुखहरुलाई कटान गरि नयाँ रुख उत्पादन गर्न सक्ने रुखको संरक्षण र सामुदायिक वनलाई सुदृढीकरण गरी वनलाई हराभरा बनाउने उद्देश्यले खोदाउ सामुदायिक वनले दिगो वन व्यवस्थापन प्रक्रिया अनुसार कार्यगरिरेको बताए ।
उनले यस प्रणाली कार्यान्यन गर्ने क्रममा विभिन्न किसिममा समस्या आउनु स्वभाविकै भएपनि यो प्रणाली राम्रो र जायज भएको बताए ।